قرا هادشي ممكن ينفعك 
If you want to change the world first change yourself ..
في الوقت اللي كتقلب فيه على طرق لقتل الوقت كاين في عالم موازي مجتمع و فرد كينقص من ساعات النوم باش يقدم شي حاجة للبشرية و يفيدها و في الوقت اللي كتعتاقد أن العالم متكالب وكيسعى لتدميرك و كتحاول تخفيف شدة الضعف اللي كتعيش فيه وتبريره بنظرية المؤامرة وغيرها كاينين مجتمعات و أفراد كتخدم وكتأمن بأن هي اللي كتصنع واقعها وأنها الوحيدة القادرة على اخراج نفسها من قبضة قوى وسيادة المجتمعات الأخرى لأنها مؤمنة بأن طبيعة الحياة قائمة على التنافسية وطبيعي الى مكنتيش قادر تنافس تكون خاضع و تابع للأقوى شئت ام أبيت وعوض ما نوجهو أصابع الاتهام نحو الأخر نسولو نفوسنا ماذا قدمنا نحن لأنفسنا و مجتمعاتنا و للعالم الى كنت صادق مع نفسك وقوي غتعتارف بكل ضعفك امام نفسك وتصارحها وهنا غتكون فالطريق الحقيقي نحو التغيير..الى كنت من الناس اللي مكتقلبش على سبب للهروب من مواجهة الواقع يمكن ليك تكمل معايا المقال للنهاية كنت من الأنواع الأخرى باراكا عليك وقف هنا...نكملومع اللي صادق أكثر ومستعد للتغيير ..
أكيد أنك كتفكر في الطريقة اللي ممكن من خلالها تغير حياتك للأفضل وتولي شخص فاعل أونافع على الأقل لنفسه من هذ المنطلق نتعاونوشويا فالأفكار وممكن نفيددك فشي حاجة تبع معايا ..
أول حاجة كما كنديرو في الشركة فاش كتوقف على الافلاس كنديرو جرد للحسابات كاملة بمعنى تا انت كون صادق مع نفسك و جبد حساباتك الذاتية وكشفها قدامك حساب حساب وحللها بينك ومتهربش من سبب الحال اللي انت فيه حيث من طبيعة النفس أنها ديما كتحاول تبرر ذاتها ''الإيكو'' من المسؤولية وكتحاول تتهم الظروف و الأخر ديما باش تعيش في راحة ''وهمية '' و بينك وبين نفسك و استنتج فين عند الخلل و علاش مقدرتيش تحقق أحلامك أو أمنياتك الأمر غيستغرق منك مدة ممكن توصل لشهر او أكثر على حسب كل فرد و السن والحياة ديالو كيف عايشها ولكن معليش شويا د الصبر راك عارف راسك في طريق الاصلاح وكنت سنوات عايش فالفراغ ماشي خسارة الى استثمرتي مدة ترجع راسك للسكة الصحيحة هذ الطريقة غتخليك تعرف أكثر نفسك و تعرف نقط ضعفك و قوتك..
من بعد ما عرفتي فين عندك الخلل مثلا غتكتاشف باللي كضيع الوقت بززاف فالتفاهة ديما كتعطي لنفسك مساحة للراحة أكثر من القياس كتجنب تواجه الواقع ديالك و كتهرب من المسؤولية ...مكتعطيش أهمية للعلم والتعلم...عزيز عليك تلعب دور الضحية و المنتقذ الدائم و تا حاجة مكتعجبكش و على فكرة هذ الصفات الأخيرة الى لقيتهم فيك عرف راسك من الفئة اللي كتهرب من مواجهة الحياة و خاص تخرج من هذ الحالة قريب قبل لا يفوت الفوت...
من بعد هذ الجرد غتجي المرحلة الصعيبة و هي الجهاد الحقيقي أنك تواجه ضعفك و مخاوفك و تغير من عاداتك و تخرج للعالم بشخصية جديدة اكثر انظباط وقوة وباش متكونش أكثر تفاؤول سمحلي نقوليك باللي غتبعك خدمة نييت على الشخصية وهنا أنت الوحيد اللي تقدر تساعد نفسك حيث عندك هدف واحد وخاص تحمس ليه و اللي هو ''انا ماشي ضعيف و قادر نعطي ونعيش حياتي كما بغايت '' وهنا كاينين أمور ممكن نعتابروها مفاتيح ممكن تعاونك نذكرهم ليك المهم متعياش قريب نكملو المقال و ترتاح
أول هذالمفاتيح هي كلمة '' إقرأ '' بمعنى خلي فعل القراءة مصاحب ليك في حياتك اعتبرو منهج أي حاجة في حياتك ربطها بالقراية الناس اللي فاتونا نفس العقل اللي عندنا اللي عندهم ولكن فاتونا بحاجة وحدة هي القراية ناس كتقرا أكثر من 200 كتاب في السنة وكتعمر الراس يعني انت قرا غا 10 كتب قالسنة راك غادي مزيان قرا الوصفات الطبية قرا المقالات أي حاجة معرفتيها الحمد لله كاين كوكل بنقرة يجبد ليك ألاف المراجع ها العار غي قرا ومع أني مع الاستناد على الكتب الورقية في البحث و لكن معليش المهم قرا و استافد..
ثاني هذ المفاتيح هوالناس المحيطين بيك اييه الناس اللي دايرين بيك ا صديقي هما من الأسباب اللي ممكن تحطمك و تعيش واقع ماشي ديالك وممكن دفعك دفعة قوية نحو التغيير الحقيقي ولذلك اختار الناس اللي تعاشر معاهم توفر فيهم هذ الشروط الطموح العمل و الصبر و عندونفس طويل و ابتعد على المحبطين و الناس اللي مريضة بالأنا والناس اللي مكتقولش ليك كلمة طيبة تعاونك بها تزيد للقدام ملي غتعاشر مع ناس فالمستوى سواء كانواصدقاء حقيقين او افتراضيين و عندهم طموحات ومستوى عالي كن أكيد أنك تا انت فواحد الوقت غتولي منهم وممكن تولي أحسن منهم ومن هنا ندعوك باش تعاود النظر فالصفحات و المجموعات و الناس اللي متبعها الى كانو من ا لناس المحبطين ومعندهم شغل وينشرو غا التفاهة خوذ قرارك تخلص منهم في أقرب وقت ابسط مثال ملي كتلقا راسك وسط هذ الزخم من المبدعين كيجيك الحماس و أول حاجة كتسول راسك شنو فاش ممكن نبدع حتى أنا ؟
ثالت واخير حاجة واللي كتجي نتيجة للنقطتين اللي ذكرت وهي الثقة في النفس ميمكنش ثيق بنفسك وانت انسان فارغ من العلم ومعندك والو الثقة كتجي من القراءة و العمل و الوسط اللي عايش فيه حيث كيعطيك دعم و شحنة ايجابية حيث طبيعي فالحياة غتعيش لحظات ضعف و لحظات قوة وبالتالي انت محتاج للدعم و اللي يقوليك كلمة و يشجعك باش تصبر و تتجاوز اللحظات اللي عشتيها.
هذشي كتبتو من خلال تجربتي المتواضعة ماشي شي حاجة أكاديمية بالمرة و بغايت نبارطجيها معاكم من منطلق الغيرة وحب لأخيك ما تحبه لنفسك و اللي عندو شي تعليق او نقطة يستفسر عليها مرحبا نعاونو بداكشي اللي قاددين عليه
Commentaires: 0
Enregistrer un commentaire