📌 نسبة العنوسة في اليابان 🇯🇵 هي الأولى عالميا والسبب راجع بنسبة أكبر للعنصر الذكري اللي مافيه مايتحمل المسؤوليات وتبعات الزواج وكيفضل يبقا عايش فالعالم المثالي تاع الألعاب الإلكترونية والأنمي وكيملأ الوقت تاعو بهاد النوع من الأنشطة بدون نسيان متوسط ساعات العمل فاليابان اللي تتراوح مابين 8 و 14 الساعة وهادشي اللي كينتج عليه واحد التعب رهيب اللي كيخليك تتمنى غير ترجع للدار، ترتاح وتنعس.
هاد الملاحظة انتبهت ليها فالقطارات تاع طوكيو، الناس كينعسو بسرعة كبيرة وكينعسو علا الكتف تاع الشخص اللي حداهم.
باش تكمل الموضوع انقر على Next
↚
📌واحد المرة وقع ليا واحد الموقف محرج فالمترو، جلسات حدايا يابانية وبعد 2 دقائق نعسات علا كتفي. هدا موقف محرج حيث نتا أجنبي والميترو عامر لأقصى درجة ، كنحرك كتفي باش زعما البنت تفيق ، ورغم كل الجهود المبذولة مبغاتش تتحرك بحال إلا واكلة المعجون ، أستسمح علا التشبيه ولكن هدا هو الوصف الأقرب للحالة اللي كانت عليها.
من بعد ما شفت تكرار هاد الظاهرة مئات المرات في اليوم عاد عرفت علا أنه شيء عادي بسبب العياء الشديد بعد 12 الساعة من العمل المستمر.
هادشي علاش المغربي مستحيل يخدم فاليابان حيث معظم شعوب البحر الأبيض المتوسط عندهم قواسم مشتركة وبما فيها التكاسل وحب الجلوس الطويل في المقاهي والبيران. وهادشي سبابو الجو والبحر والتقاليد.
📌ومابين الأسباب اللي كتشجع علا العنوسة هي نسبة كبيرة تاع الذكور كيرفضو فكرة اشتغال المرءة، و اللي حتا هي كترفض فكرة اتباع النموذج التقليدي الياباني واللي كيتجلى في الجلوس فالمنزل كربة بيت ومعاملة الرجل كألهة اليونان ، وهاد النموذج هو اللي كنشوفوه فمعظم الأفلام اليابانية التقليدية. وهاد الفكرة مزال شائعة في معظم الدول العربية وبالأخص في دول الشرق الأوسط اللي كيعتابرو خروج المرءة للعمل ضرب في رجولة الزوج بسبب التقاليد الموروثة عن المجتمع البدووي الذكوري.
📌النسبة تاع اليابانيين واليابانيات اللي عمرو سبق ليهم مارسو الجنس هو 65% ، واللي كيتعتابر جد مرتفع بالنسبة لدولة لا
دينية لا تتبع أي دستور إلاهي أو كتاب سموي كيجرم العلاقات الجنسية خارج إطار الزواج.
↚
وحتا إلا شفنا النصوص تاع العقيدة البودية أو الشينطو ، اللي كتعتابرو الديانتان السائدتان فاليابان، كنلقاو أن هنالك تسامح كبير وتشجيع علا تكوين العلاقات لإنجاح دورة تناسخ الإنسان.
📌وبالنسبة اللي كيسمع بإسم "الشينطو" لأول مرة ، فهو عبارة علا العقيدة المتبعة بنسبة كبيرة فاليابان واللي ممعروفش المؤسس تاعها ومعندهاش كتاب سماوي أو دستور إنساني عكس الديانات الإبراهيمية الأربع. كل طائفة من الشينطو كتظن أن وجهة النظر تاعها صحيحة انطلاقا من معتقدات تقليدية قريبة للبيئة اللي كبر فيها الفرد. القاسم المشترك الوحيد هو اعتبار الإنسان كائن طيب في الأساس، وأن الشر يقع نتيجة تدخل الأرواح الشريرة، وتنحصر أغلب العبادات "الشنتوية" في إبعاد هذه الأرواح الشريرة عن طريق تنقية النفس، عن طريق الصلوات وتقديم القرابين للإله باش يصرف عليهم المصائب.
📌فالديانات الأبراهيمية كنعتابرو "الشيطان" هو "الروح الشريرة" اللي كتأثر على بعض سلوكات الإنسان الخبيثة. أي أن القاسم المشترك هو التأثير الروحي لقوى خفية...
إلا تعمقنا بزاف فنصوص البوذية كنبداو نفهمو أصل العنوسة عند اليابانيين وعند نسبة كبيرة تاع معتنقي المذهب البوذي اللي متواجديين فعدد كبير من الدول الأسيوية . حيث حسب تعاليم البوذا، هنالك تشجيع على التصدق على الفقراء وترك الغنى و إجبار النفس على التقشف و تحذير من الجنس الغير المنضبط والمال والترغيب في الابتعاد عن الزواج سوى لأسباب متعلقة بالدورة التكاثرية لضمان بقاء الجنس البشري. هاد الأفكار أثرو بشكل غير مباشر علا فئة كبيرة تاع البوذيين اليابانيين والنتيجة هي الزهد المبالغ فيه فالحياة والإبتعاد عن التزاوج إلا في الضرورات القصوى. المعابد تاع البوديين و الشينتونيين موجود بكثرة في مدينة كيوتو اللي كنعتابرها أفضل مدينة زرتها فحياتي حيث كل شيء مختلف. بحال إلا رجعتي لشي فيلم قديم تاع بريسلي ^^
↚
هادشي علاش كنعتابر اليابان أحسن دولة زرتها لحد الساعة.
الملاحظة الأولى لأي سائح قام بزيارة اليابان هي طبيعة المواطن الياباني الجد المسالمة و المتسامحة ، والأخلاق المثالية اللي كيتميزو بيها . بسبب التعليم والتربية وتأثير العقيدة البوذية اللي كتركز علا التسامح في أعلى درجاته،
حتى الحروب كان عندها تأثير كبير علا طبيعة هاد الجيل. إلا قريتي التاريخ تاع اليابان ، غادي تستغرب من الدموية تاعهم بسبب إعلانهم الحرب علا الدول العظمى بحال روسيا والصين وأمريكا ، لولا اضطرار أمريكا لاستخدام اللاأخلاقيات اللي تتجلى فالسلاح النووي لردع اليابان. هاد التاريخ الدموي عطا واحد الجيل معاصر اكثر سلمية يستنكر التاريخ تاعو . نفس الملاحظة تنطبق علا ألمانيا النازية وبريطانيا.
📌جميع الدول العظمى السفاحة أصبح عندها جيل جديد أكثر سلمية بسبب حقده الدفين علا الجرائم المرتكبة خلال الحروب العالمية الأخيرة.
📌بلا منطول عليكم كثر ^^ ، بالنسبة للميزانية اللي غادي تحتاجها هي مابين 20000 و 35000 درهم لمدة أسبوعين. كل واحد والمستوى المعيشي والقدرة الشرائية تاعو.
أهم شيء هو زيارة المدن الأربع الأساسية اللي هما : طوكيو - كيوطو - أوساكا - نارا
📌القنصلية تاع اليابان كاينة فالرباط والثمن هو 270dh , إلاماعطاوكش visa راه ماغادي تخلص والو.
Commentaires: 0
Enregistrer un commentaire