# ﺍﻟﺪﺭﺍﺳﺔ ﻓﻲ # ﺃﻟﻤﺎﻧﻴﺎ
Credit :Abdallah Wahbi
ﻟﺴﻼﻡ ﻋﻠﻴﻜﻢ ... ﻛﻴﻤﺎ ﻭﻋﺪﺗﻜﻮﻡ ﻣﻮﺿﻮﻉ ﺍﻟﺪﺭﺍﺳﺔ ﻓﻲ ﺃﻟﻤﺎﻧﻴﺎ ﻭ ﻛﻨﺘﻤﻨﻰ ﻧﻜﻮﻥ ﻋﻨﺪ ﺣﺴﻦ ﻇﻦ ﺍﻟﺠﻤﻴﻊ ... ﻓﺎﻻﻭﻝ ﻏﺎﺩﻱ ﻧﺘﻜﻠﻤﻮﺍ ﻋﻦ ﻧﻈﺎﻡ ﺍﻟﺪﺭﺍﺳﺔ ﻓﻲ ﺃﻟﻤﺎﻧﻴﺎ .. ﺍﻻ ﻗﻠﻨﺎ ﺃﻟﻤﺎﻧﻴﺎ ﻓﺮﺍﻩ ﺗﺎﻧﺘﻜﻠﻤﻮﺍ ﻋﻠﻰ ﻭﺍﺣﺪ ﻣﻦ ﺃﻓﻀﻞ ﺃﻧﻈﻤﺔ ﺍﻟﺪﺭﺍﺳﺔ ﺍﻟﻤﺼﻨﻔﺔ ﻋﺎﻟﻤﻴﺎ ﻳﻌﻨﻲ ﺍﻟﺸﻬﺎﺩﺓ ﺩﻳﺎﻟﻬﺎ ﺗﺨﺪﻡ ﺑﻬﺎ ﻓﻴﻨﻤﺎ ﻣﺸﻴﺘﻲ .. ﻧﺪﺧﻠﻮﺍ ﺩﺑﺎ ﻓﺎﻟﻤﻌﻘﻮﻝ ﻭ ﺍﻷﻭﺭﻭ ﻫﻬﻪ ، ﻣﻬﻢ ﺍﻟﺪﺭﺍﺳﺔ ﻓﻲ ﺃﻟﻤﺎﻧﻴﺎ ﻣﺠﺎﻧﻴﺔ ﻓﺎﻟﺠﺎﻣﻌﺎﺕ ﺍﻟﺤﻜﻮﻣﻴﺔ ﻛﺘﺨﻠﺺ ﻏﻴﺮ ﺷﻲ ﺑﺮﻛﺔ ﻓﻲ ﻛﻞ ﻓﺼﻞ ﺩﺭﺍﺳﻲ ﻣﺎ ﺑﻴﻦ 150 ﺣﺘﺎﻝ 250 ﺃﻭﺭﻭ ﻟﻠﻔﺼﻞ ﺍﻟﺪﺭﺍﺳﻲ ﺍﻟﻮﺍﺣﺪ ... ﻭ ﻫﺬﻩ ﻛﻤﻌﻠﻮﻣﺔ ﺇﺿﺎﻓﻴﺔ ﻗﺮﻳﺘﻬﺎ ﻑ ﺃﺣﺪ ﺍﻟﻤﻮﺍﻗﻊ ﺍﻷﺟﻨﺒﻴﺔ ﻭ ﻟﻜﻦ ﻣﺎﻋﺮﻓﺘﺶ ﻭﺍﺵ ﺻﺤﻴﺤﺔ ﻭﻻ ﻻ ، ﻗﺎﻟﻴﻚ ﺃﺳﻴﺪﻱ ﺍﻟﺠﺎﻣﻌﺎﺕ ﺍﻻﻟﻤﺎﻧﻴﺔ ﻗﺮﻳﺐ ﻏﺎﺩﻱ ﺗﻔﺮﺽ ﺭﺳﻮﻡ ﺩﺭﺍﺳﻴﺔ ﻋﻠﻰ ﺍﻟﻄﻠﺒﺔ ﺍﻷﺟﺎﻧﺐ ( 1500 ﺃﻭﺭﻭ ﻟﻠﻔﺼﻞ ﺍﻟﻮﺍﺣﺪ ) ﻳﻌﻨﻲ ﺿﺮﺑﻮ ﺍﻟﺤﺪﻳﺪ ﻣﺎﺣﺪﻭ ﺳﺨﻮﻥ .. ﻭ ﺳﺘﻐﻠﻮﺍ ﺍﻟﻔﺮﺻﺔ ﻗﺒﻞ ﻣﺎ ﻳﺪﻳﺮﻭ ﺑﺤﺎﻝ ﻓﻴﻨﻠﻨﺪﺍ ... ﻫﺎﺩﺷﻲ ﺑﺎﻟﻨﺴﺒﺔ ﻟﺘﻜﻠﻔﺔ ﺍﻟﺪﺭﺍﺳﺔ ... ﻣﻦ ﺑﻌﺪ ﻣﺎ ﻛﺘﻘﺒﻞ ﻓﺸﻲ ﺟﺎﻣﻌﺔ ﻏﺎﺩﻱ ﻳﺨﺼﻚ ﺗﺘﺜﺒﺖ ﺑﻠﻲ ﻋﻨﺪﻙ 8000 ﺣﺘﺎﻝ 9000 ﺃﻭﺭﻭ ﻛﻤﺼﺎﺭﻳﻒ ﻟﻠﻤﻌﻴﺸﺔ ﺳﻨﻮﻳﺎ .
ﺩﺍﺑﺎ ﻧﺘﻜﻠﻤﻮﺍ ﻋﻠﻰ ﻣﺼﺎﺭﻳﻒ ﺍﻟﻤﻌﻴﺸﺔ ﻭ ﺍﻟﻜﺮﺍ ﻭ ﻣﺎ ﺟﺎﻭﺭﻫﻤﺎ ، ﻫﺎﺫ ﺍﻟﻨﻘﻄﺔ ﺑﺎﻟﻀﺒﻂ ﻛﺎﻳﺤﻴﺮﻭﺍ ﻓﻴﻬﺎ ﺍﻟﺪﺭﺍﺭﻱ ، ﺍﻟﻤﻌﻴﺸﺔ ﺃﺳﻴﺪﻱ ﻓﻲ ﺃﻟﻤﺎﻧﻴﺎ ﺭﺍﻩ ﻏﺎﻟﻴﺔ ﺷﻮﻳﺎ ﻓﻲ ﺑﻌﺾ ﺍﻷﻣﺎﻛﻦ ﺑﺤﺎﻝ ﻣﺜﻼ ﻣﻴﻮﻧﻴﺦ ﺗﺼﻨﻔﺎﺕ ﻣﺎ ﺑﻴﻦ ﺃﻏﻠﻰ ﻣﺪﻳﻨﺔ ﻑ ﺃﻟﻤﺎﻧﻴﺎ ... ﺍﻟﺴﻜﻦ : ﻣﻤﻜﻦ ﺗﻜﺮﻱ ﺷﻘﺔ ﻣﻌﺎ ﺻﺤﺎﺑﻚ ﻳﻌﻨﻲ ﺷﻘﺔ ﻣﺸﺘﺮﻛﺔ ﻏﺎﺩﻱ ﺗﻘﺎﻡ ﻋﻠﻴﻚ 250 ﺣﺘﺎﻝ 350 ﺃﻭﺭﻭ ﻓﺎﻟﺸﻬﺮ ﺃﻭﻻ ﻣﻤﻜﻦ ﺗﻜﺮﻱ ﻏﺮﻓﺔ ﻓﻲ ﺍﻹﻗﺎﻣﺎﺕ ﺍﻟﻄﻼﺑﻴﺔ ﻭ ﺍﻟﺘﻜﻠﻔﺔ ﺗﻘﺮﻳﺒﺎ ﻓﻲ ﺣﺪﻭﺩ 260 ﺃﻭﺭﻭ ... ﺍﻟﻨﻘﻞ ﻭ ﺍﻟﻤﺎﻛﻠﺔ ﻭ ﺍﻟﻨﻘﻞ ﺩﺍﻛﺸﻲ ﻋﻠﻰ ﺣﺴﺎﺏ ﻛﻴﻔﺎﺵ ﻛﺘﺼﺮﻑ ﻭﺍﺵ ﻛﺘﺨﺴﺮ ﺑﺰﺍﻑ ﻭ ﻻ ﻣﻘﺘﺎﺻﺪ ... ﻋﻠﻰ ﺍﻟﻌﻤﻮﻡ ﻫﺎﺫﻭ ﻫﻮﻣﺎ ﺍﻷﺭﻗﺎﻡ ﺍﻟﺘﻘﺮﻳﺒﻴﺔ :
ﺍﻷﻛﻞ : 160 ﺃﻭﺭﻭ ﻓﺎﻟﺸﻬﺮ
ﺍﻟﺤﻮﺍﻳﺞ 50: ﺃﻭﺭﻭ ﻓﺎﻟﺸﻬﺮ
ﺍﻟﺘﺮﻭﻧﺴﺒﻮﺭ : ﻣﺎ ﺑﻴﻦ 80 ﺗﺎﻝ 100 ﺃﻭﺭﻭ
ﺍﻟﺘﻴﻠﻴﻔﻮﻥ ﻭ ﺍﻻﻧﺘﺮﻧﺖ : ﻓﻲ ﺣﺪﻭﺩ 50 ﺃﻭﺭﻭ
....ﺍﻟﻨﺸﺎﻁ ﻭ ﺍﻟﺪﻭﺭﺍﻥ ﻫﻪ : ﻣﺎ ﺑﻴﻦ 70 ﺗﺎﻝ 100 ﺃﻭﺭﻭ
↚
ﻣﺜﻼ ﺑﺤﺎﻝ ﺍﻣﻼﺑﺲ ﻣﻦ ﺃﻷﺣﺴﻦ ﺗﺪﻱ ﻣﻌﺎﻙ ﺩﺍﻛﺸﻲ ﻣﻦ ﺍﻟﻤﻐﺮﺏ ﺣﻴﺘﺎ ﺷﺘﻤﺎﻙ ﻏﺎﻟﻴﻴﻦ ﺷﻮﻳﺎ ، ﻣﻦ ﺍﻻﻓﻀﻞ ﺗﻨﻘﺺ ﻣﻦ ﺍﻟﻨﺸﺎﻁ ﻭ ﺍﻟﺪﻭﺭﺍﻥ ﺑﺎﺵ ﺗﻘﺘﺎﺻﺪ ﺷﻮﻳﺎ .. ﻭ ﻫﺎﺫ ﺍﻷﺭﻗﺎﻡ ﻏﻴﺮ ﺗﻘﺮﻳﺒﻴﺔ ﻳﻌﻨﻲ ﻳﻘﺪﺭ ﺗﺰﻳﺪ ﺃﻭ ﺗﻨﻘﺺ ﻋﻠﻰ ﺣﺴﺐ ﺍﻟﺸﺨﺺ ﻭ ﺍﻟﻤﺪﻳﻨﺔ .
ﻫﺎﺫ ﺍﻟﻤﻮﻗﻊ ﻏﺎﺩﻱ ﻳﺴﺎﻋﺪﻛﻮﻡ ﺑﺰﺍﻑ ﺑﺎﺵ ﺗﻌﺮﻓﻮﺍ ﻣﺼﺎﺭﻳﻒ ﺍﻟﻤﻌﻴﺸﺔ ﻓﻲ ﺃﻱ ﻣﺪﻳﻨﺔ ﻓﻲ ﺍﻟﻌﺎﻟﻢ : www.numbeo.com
ﻭ ﺭﻏﻢ ﻫﺎﺫ ﺍﻟﻤﺼﺎﺭﻳﻒ ﻛﺎﻣﻠﻴﻦ ﺑﻼ ﻣﺎ ﺗﺨﻠﻌﻮﺍ ، ﺍﻟﻘﺎﻧﻮﻥ ﺍﻷﻟﻤﺎﻧﻲ ﻛﺎﻳﻤﻨﺢ ﺍﻟﺤﻖ ﻟﻠﻄﻠﺒﺔ ﺍﻷﺟﺎﻧﺐ ﺑﺎﺵ ﻳﺨﺪﻣﻮﺍ 120 ﻳﻮﻡ ﻓﻲ ﺍﻟﺴﻨﺔ ﺑﺪﻭﺍﻡ ﻛﺎﻣﻞ ﺃﻱ ﺗﻘﺮﻳﺒﺎ 1000 ﺷﺎﻋﺔ ﻓﻲ ﺍﻟﺴﻨﺔ ... ﻭ ﺍﻟﺮﻭﺍﺗﺐ ﻛﺎﺗﺮﺍﻭﺡ ﻣﺎ ﺑﻴﻦ 7 ﺗﺎﻝ 15 ﺍﻭﺭﻭ ﻟﻠﺴﺎﻋﺔ ﺍﻟﻮﺍﺣﺪ ﻳﻌﻨﻲ ﺑﺎﻟﻌﺮﺑﻴﺔ ﺗﺎﻋﺮﺍﺑﺎﺕ ﻏﺎﺩﻱ ﺩﻳﺒﺎﻧﻲ ﺭﺍﺳﻚ ..
↚
ﺍﻟﺘﺴﺠﻴﻞ ﻓﺎﻟﺠﺎﻣﻌﺎﺕ ﺍﻷﻟﻤﺎﻧﻴﺔ : ﺍﻟﺘﺴﺠﻴﻞ ﺗﻴﻜﻮﻥ ﺑﻄﺮﻳﻘﺔ ﻣﺒﺎﺷﺮﺓ ﻣﻦ ﻣﻮﻗﻊ ﺍﻟﺠﺎﻣﻌﺔ ﻳﻌﻨﻲ ﻏﺎﺩﻱ ﺗﻘﻠﺐ ﻋﻠﻰ ﺍﻟﺠﺎﻣﻌﺔ ﺍﻟﻠﻲ ﺑﻐﻴﺘﻲ ﻭ ﺩﺧﻞ ﻟﻠﻤﻮﻗﻊ ﺩﻳﺎﻟﻬﺎ ﻭ ﺗﻌﻤﺮ ﻭﺍﺣﺪ ﺍﻻﺳﺘﻤﺎﺭﺓ ﺗﻤﺎﻙ ﻭ ﺗﺨﺘﺎﺭ ﺍﻟﺘﺨﺼﺺ ﺍﻟﻠﻲ ﺑﻐﻴﺘﻲ ﺗﻘﺮﺍﻩ .. ﺍﻟﺘﺴﺠﻴﻞ ﻓﺎﻟﻐﺎﻟﺐ ﺗﺎﻳﻜﻮﻥ ﻓﺎﻟﺼﻴﻒ ﻭ ﺍﻟﺸﺘﺎﺀ ... ﻓﺒﻌﺾ ﺍﻟﺠﺎﻣﻌﺎﺕ ﺗﺎﻳﻜﻮﻥ ﺍﻟﺘﺴﺠﻴﻞ ﻋﻦ ﻃﺮﻳﻖ ﻣﻮﻗﻊ uni-assist.de ﻭ ﻟﻜﻦ ﻛﺎﺗﺨﻠﺺ ﺷﻲ ﺑﺮﻛﺔ ﻓﻬﺎﺩ ﺍﻟﻤﻮﻗﻊ .
ﺍﻟﺸﺮﻭﻁ : ﺍﻟﻠﻲ ﺑﻐﺎﻭ ﺇﻗﺮﺍﻭ ﺑﺎﻟﻠﻐﺔ ﺍﻻﻧﺠﻠﻴﺰﻳﺔ ﺧﺎﺻﻚ ﺗﺘﻮﻓﺮ ﻋﻠﻰ ﺷﻬﺎﺩﺓ ﺗﺘﺜﺐ ﺍﺗﻘﺎﻧﻚ ﻟﻠﻐﺔ ﺍﻻﻧﺠﻠﻴﺰﻳﺔ ﺇﻣﺎ ﺍﻻﻟﺘﺲ ﺃﻭ ﺍﻟﺘﻮﻓﻞ ﻭ ﺍﻟﻠﻲ ﺑﻐﺎﻭ ﺍﻗﺮﺍﻭ ﺑﺎﻟﻠﻐﺔ ﺍﻻﻟﻤﺎﻧﻴﺔ ﺧﺎﺹ ﺗﻜﻮﻥ ﻋﻨﺪﻙ ﺷﻬﺎﺩﺓ ﺗﺘﺜﺒﺖ ﻣﻌﺮﻓﺘﻚ ﺑﺎﻟﻠﻐﺔ ﺍﻻﻟﻤﺎﻧﻴﺔ ﻭ ﻗﺮﻳﺖ ﻓﻮﺍﺣﺪ ﺍﻟﻤﻮﻗﻊ ﺑﺎﻟﻠﻲ ﻣﻤﻜﻦ ﺗﻘﺮﺍ ﺳﻨﺔ ﺗﺤﻀﻴﺮﻳﺔ ﻓﺎﻟﻠﻐﺔ ﺗﻤﺎﻙ ﻭ ﻟﻜﻦ ﻣﺎ ﻣﺘﺄﻛﺪﺵ ﻣﻦ ﺍﻟﻤﻌﻠﻮﻣﺔ . ...
ﺍﻟﺠﺎﻣﻌﺎﺕ ﺍﻷﻟﻤﺎﻧﻴﺔ ﻻ ﺗﺸﺘﺮﻁ ﻣﻌﺪﻝ ﻟﻠﻮﻟﻮﺝ ﺇﻟﻴﻬﺎ ، ﻟﻜﻦ ﻛﺎﻳﻨﻴﻦ ﺷﻲ ﺗﺨﺼﺼﺎﺕ ﻛﺎﻳﻄﻠﺒﻮ ﺍﻟﻤﻌﺪﻝ ﺑﺤﺎﻝ ﺍﻟﻄﺐ ﻣﺜﻼ ...
ﻣﺮﺣﻠﺔ ﺍﻟﻔﻴﺰﺍ : ﻛﺎﺗﺠﻤﻊ ﺍﻟﻮﺛﺎﺋﻖ ﺩﻳﺎﻟﻚ .. ﺟﻮﺍﺯ ﺍﻟﺴﻔﺮ ، ﺷﻬﺎﺩﺓ ﺍﻟﺒﺎﻛﺎﻟﻮﺭﻳﺎ ، ﺍﻟﺴﻴﺮﺓ ﺍﻟﺬﺍﺗﻴﺔ ، ﺧﻄﺎﺏ ﺗﺤﻔﻴﺰﻱ ﻗﻮﻱ ، ﺷﻬﺎﺩﺓ ﺍﺛﺒﺎﺕ ﺍﻟﻠﻐﺔ + ﻭﺛﻴﻘﺔ ﺗﺘﺜﺐ ﺗﻮﻓﺮﻙ ﻋﻠﻰ ﻣﺒﻠﻎ 8000 ﺗﺎﻝ 9000 ﺃﻭﺭﻭ ﻓﻲ ﺑﻨﻚ ﺃﻟﻤﺎﻧﻲ ﺃﻭ ﻭﺛﻴﻘﺔ ﺿﻤﺎﻧﺔ ﻳﺘﻌﻬﺪ ﻓﻴﻬﺎ ﺃﺣﺪ ﺃﻓﺮﺍﺩ ﻋﺎﺋﻠﺘﻚ ﻣﻘﻴﻢ ﺑﺄﻟﻤﺎﻧﻴﺎ ﺃﻭ ﺍﻻﺗﺤﺎﺩ ﺍﻻﺭﻭﺑﻲ ﺑﺘﺤﻤﻞ ﻧﻔﻘﺎﺕ ﻣﻌﻴﺸﺘﻚ ..
ﺭﺍﺑﻂ ﻓﺘﺢ ﺣﺴﺎﺏ ﺑﻨﻜﻲ ﻓﻲ ﺃﻟﻤﺎﻧﻴﺎ :
db.student@db.com
ﻭ ﻛﺈﺿﺎﻓﺔ ﻓﺄﻟﻤﺎﻧﻴﺎ ﻛﺘﻌﻄﻴﻚ ﺇﻗﺎﻣﺔ ﻣﺪﺗﻬﺎ ﺳﻨﺔ ﻭ ﻧﺼﻒ ﺑﻌﺪ ﺇﺗﻤﺎﻣﻚ ﻟﻠﺪﺭﺍﺳﺔ ، ﻭ ﻋﻨﺪﻙ ﺍﻟﺤﻖ ﺑﺎﺵ ﺗﺨﺪﻡ .. ﻫﺎﺫ ﺍﻻﻗﺎﻣﺔ ﻗﺎﺑﻠﺔ ﻟﻠﺘﺠﺪﻳﺪ .
ﻛﻨﺘﻤﻨﻰ ﺃﻧﻨﻲ ﻣﺎ ﻧﺴﺖ ﻭﺍﻟﻮ ، ﻛﺘﻤﻨﻰ ﻧﻜﻮﻥ ﻋﻨﺪ ﺣﺴﻦ ﻇﻨﻜﻢ ... ﻭ ﺍﻟﻤﻮﺿﻮﻉ ﺍﻟﻘﺎﺩﻡ ﺇﻥ ﺷﺎﺀ ﺍﻟﻠﻪ ﻏﺎﺩﻱ ﻳﻜﻮﻥ ﻋﻠﻰ ﺍﻟﺪﻭ ﺍﻻﺳﻜﻨﺪﻧﺎﻓﻴﺔ
Tarik EL Allaoui
Commentaires: 0
Enregistrer un commentaire